# Start噏兩句：點解香港出唔到個Elon Musk？ By [Choco](https://paragraph.com/@chocochu) · 2021-10-24 --- It's time to build, but we can't -------------------------------- 時下嘅後生仔，見證政府腐敗，又經歷史無前例嘅經濟大停擺，「未來」已經變咗講嚟都嘥氣嘅話題。 從歷史看，每一次咁樣嘅經濟低谷，都會引發一股創業熱潮。 大部分今日變咗獨角獸嘅公司，例如Apple, Airbnb, Uber, WhatsApp等，都係喺經濟大衰退嘅時期創業嘅。 初生之犢不畏虎，即刻社會氣氛幾低沉，總有一班充滿熱誠，想以一己之力為行業，為社會帶嚟改變嘅年輕領袖出現。 2020年嘅香港，有咁多唔肯向現實低頭嘅年輕人，理應見到年輕創業家湧現，百家爭鳴嘅盛況㗎？ 然而，呢個想像並冇實現。香港初創圈喺呢一年更係步入寒冬，表現強差人意，俾其他[後起嘅初創城市趕過](https://inews.hket.com/article/2679776/%E3%80%90%E9%A6%99%E6%B8%AF%E5%89%B5%E7%A7%91%E3%80%91%E5%89%B5%E6%A5%AD%E7%94%9F%E6%85%8B%E5%9C%88%E6%B8%AF%E4%BD%8D%E5%88%97%E5%85%A8%E7%90%8329%E8%B7%8C4%E4%BD%8D%E3%80%80%E8%90%BD%E5%BE%8C%E6%9D%AD%E5%B7%9E%E5%8E%9F%E5%9B%A0%E6%98%AF%EF%BC%9F)。 香港嘅創業風氣變成咁，係因為香港人唔知創業係點樣嘅一回事。呢個概念太虛，究竟創業係指係租間舖頭賣下嘢，定攞個發達大計搵投資者科水？如果冇大計，又冇父幹，憑啲咩學人創業？ 再睇多一樣嘢。 喺上年武漢肺炎未爆發之前，曾經有一波好特別嘅創業潮，叫做「黃色經濟圈」。為咗支援抗爭陣營，杯葛親政府嘅資本，有志之士們搞咗一堆Project出嚟，網店、物流、搵工平台，乜都有。 可惜嘅係呢堆黃圈產物，創辦者嘅初心係一股熱誠，未必諗過點樣持續生存，亦未必識搞好一壇生意。 於是，即使有黃圈強力嘅資源支持，呢啲Project大部分都冇好嘅Business Model可以妥善利用。結果就係搞唔起，甚至逃唔過燒哂錢中途夭折嘅命運。 * * * 個個都創業，但個個都唔識創業 -------------- 喺香港講創業，分為兩種： 第一種我稱為「搞生意」。 講起搞生意，啲人兜口兜面就會問你：你好有米？大眾嘅認知停留喺覺得創業等於有本錢，有父幹。 「創業」呢個term好得意，好易令人誤會，阿豬阿狗都可以話係創業人士。整間網店賣下淘寶衫話係，特許經營開間七仔又係、開間舖頭賣黑糖珍奶又係，就連保險嗰啲都話自己係創業，吹咩。為咗區分，呢啲一律叫「搞生意」。 撇開「搞生意」，就係本文想重點講嘅「初創」（Startup）。 乜嘢係Startup？有人講過：Startups are hyper-growth companies. 而香港圈中人心目中嘅初創，係好典型嗰啲矽谷初創。 拎住份Pitch Deck周圍去搵VC Raise種子輪，再ABCD輪咁上去。以幾何級增長為目標。目標唔係短期內收支平衡，營利，而係不停擴張（Scale），最終被收購或者上市（Exit）。 唔係間間初創都適合走呢條路，犧牲一切追求估值同增長。 好似電商初創Gumroad咁，兩條路都走過。當年啱啱起家Raise咗幾千萬，卻因為突然而嚟嘅增長停滯由備受期待嘅電商新星跌落谷底，面臨倒閉。個CEO Sahil Lavingia唯有炒哂炒哂所有員工變成一人公司，但後來Gumroad冇咗跑數嘅壓力，愈做愈好，增長比以往更好。 Bootstrap成功嘅例子仲有好多。Basecamp - 呢個團隊合作軟件由創辦起一蚊VC錢都冇攞過，照樣做到千億美元市值嘅公司。 但香港係個扭曲嘅地方。 記得當年喺大學嘅創業中心，中心Director會約我哋呢啲創業隊伍定期見面，而每個Project佢唔理你類型咩規模咩目標，一律要你去砌成上述嗰種VC-backed Startups。迫公司行一個錯嘅方向，分分鐘害到創業者車毁人亡。 香港初創界嘅文化，除咗乜都水人去R政府錢，再搵投資之外，仲有就係偏好人工智能、機器學習、IoT、大數據、生物科技、金融科技、醫療科技、區塊鏈呢啲Buzzword。當初創同呢啲「Deep Tech」劃上等號，圈外嘅新人以為搞初創要R&D，門檻觸不可及，點會有創業念頭。 初創、科創，都係講「創意」。只要你解決緊一個有市場嘅問題，唔理你Deep Tech定Shit Tech，都可以做到一間成功嘅公司。 初創界嘅巨頭，Facebook, Twitch, Snapchat, WhatsApp呢啲，創辦人都冇相關「專業/行業」知識，都係藉住一個Idea，再靠不懈學習同堅持走到今時今日。 呢個世界每日都喺度變，每日有新嘅趨勢。 軟件初創嘅市場潛力喺近年更係有昇冇跌，最近熱門生產力軟件Notion，作為一隻Note-Taking/Knowledge Management類嘅App，佢嘅估值已經達到20億美元，可見[軟件真係食緊呢個世界](https://a16z.com/2011/08/20/why-software-is-eating-the-world/)。 創業講資金，冇父幹又冇注資，係咪冇辦法創業？唔怕，科技同時勢企喺你嗰邊。 網絡平台，手機應用程式，軟件作為服務（SaaS）呢類產品，隨著無碼工具（NoCode Tools）如Adalo, Webflow, Bubble能力越趨強大，開發網站/軟件唔再係工程師嘅專利，冇Tech背景嘅人摸返一兩個月就已經整到個MVP（Minimum Viable Product）出嚟，又使乜攞幾百萬出去搵人寫隻App。 疫情殺到埋身，返工變成在家工作。呢個趨勢已經不可逆轉。Spotify, Twitter等公司已經決定以後都用遙距（Remote）嘅方針去營運，好多協助Remote Workspace嘅工具亦應運而生。就算唔係完全Remote，共享辦工室四處都係，租金已經唔再係Startup嘅最大煩惱點。 2020，捉得緊呢啲趨勢，絕對係創業嘅好時機。偏偏呢啲商機香港追得唔夠貼，往往都會錯過。 * * * 中文、緊貼潮流嘅初創資訊 ------------ 香港年輕人對創業陌生而懼怯。黃圈創業好多都失敗告終。乜呢個創業話題，真係有咁冷門咩？ 非也。網絡上關於Startup嘅內容多到數唔清。然而，初創文化喺中外之間好似總係有隔層咁，中文嘅內容少，粵語/香港嘅更加少之又少。 香港初創界嘅社群，以WHub為首，並唔係由香港本地人搞嘅。百貨應百客，咁香港初創圈整嘅資訊，搞嘅活動係應啲咩客？答案係鬼仔鬼妹，仲有ABC。 因為你搵得到關於香港嘅Startup嘢，十中有九都係英文嘅。 呢下就尷尬喇。所謂「[冇人識英文，痴撚線公司](https://youtu.be/--5p5-fkW9s)」，香港多數後生仔面對「英文」呢個非母語嘅Content，唔多唔少有心理關口，除非有迫切需要，否則係唔會主動接觸嘅。 冇錯香港係個國際化嘅城市，同埋商業世界英文係行先嘅，咁但係中文或者粵語話哂都係法定語言之一，更係最多香港人用嘅語言，冇理由比例咁少吓嘛。 Content嘅功用係Educate，亦都係Marketing，睇到初創嘅嘢，知多咗，然後感興趣，先會主動接觸更多。冇足夠嘅中文Content，就更加少本地人入坑。Startup圈Reach唔到本地人，自然圈內嘅文化就愈嚟愈鬼仔鬼妹/ABC化，呢個Loop只會係咁咁Reinforce，久而久之就有種離地嘅感覺嘞。 英文可以學。但有野心，有創意嘅香港創業家，錯過咗就錯過咗。 其實圈中不泛有寫中文初創資訊嘅有心人，[拾捌堂](https://choco.is/18hall.com)，StartupBeat，Keith Li嘅偉大航道，Unwire等等。但佢哋分享嘅資訊以報導性質嘅新聞，或者著眼亞洲初創嘅資訊居多。技術性，教學性質，最新趨勢呢類係相當缺乏嘅。 * * * It's time to build, and we can. ------------------------------- 如果一直資訊不足，呢個惡性循環就只能繼續，香港初創會慢慢變成Deadbody。更重要嘅係，初創係可以改變一切嘅[黑天鵝](http://www.paulgraham.com/swan.html)。如果香港出到個好似Elon Musk咁嘅人物，或者香港，甚至人類嘅命運都可以有所改變。 咁，如果你想改變現狀，可以做啲咩呢？ 第一步，梗係... 留意我個Blog，[訂閱我嘅電子報](https://choco.substack.com/)（笑）。 嚟緊我會寫好多初創嘢，你唔會想錯過嘅。 第二步，睇多啲外國嘅初創Content： Twitter係一個充滿智慧嘅神奇平台，佢獨特嘅設計令你只要言之有物，就可以同出名嘅人交流。而且好多初創界嘅領袖經常喺Twitter分享初創經驗心得，討論創業技巧，所以係好值得睇嘅。以下係推薦嘅一啲Twitter Handles（用戶），有興趣就望下： * @shl * @naval * @paulg * @bentossell * @dhh * @balajis * @sama * @hnshah 另外就係網站同電子報， Techmeme, Y Combinator, Hacker News, AngelList等等。 第三步，Build Something。分享你睇到嘅嘢。 唔需要怕自己無知，識得少。每個人都係由零開始，我自己都有嚴重嘅Imposter Syndrome，但時刻提醒自己：呢個係學習嘅過程，冇嘢值得羞恥。 無論你學我寫Blog又好，拍YouTube，Newsletter，Podcast，Online Course，小至Facebook噏兩句，大至落水成立自己初創都好。只要肯創作（最好用中文啦），不但可以搵到錢識到人，更可以幫手改變香港嘅初創圈。我好肯定，你往後睇返，必定會覺得呢個決定冇錯。 --- *Originally published on [Choco](https://paragraph.com/@chocochu/start-elon-musk)*