# 廣東話答客問

By [0xluden](https://paragraph.com/@luden) · 2023-02-06

---

**你係以前港推/FB 嘅 C……**

係或者唔係，視乎你講緊邊個。無刻意隱暪，但亦唔想用呢個身份喺英文圈子玩。

**點解唔留喺港推/FB？**

1.  我 09 年入推，相比起啲出推如呼吸嘅人我本來就唔係咩活躍推友，係以前 blogger 年代識落一班興趣各異嘅香港推友，但從來唔覺得同港推氣氛夾，19 年後更加睇三分鐘就降 san。十幾年前識落嘅朋友啱傾自有其他聯絡方式，日日一齊打緊機講緊時事嘅朋友都喺度，無乜必要留喺個越嚟越黐線無乜營養嘅公海。因為偉大嘅 algo 之神嘅關係，我個 account 基本上廢咗，點洗推洗 follow 都無可能唔係 feed 返啲無營養降 san 推俾我，即係我更加應該砍掉重練，而家留返個 account 用嚟應酬啲煩膠 project RT & like（所以原本 fo 開我嗰啲當睇到垃圾推碌過佢就 OK，我亦唔想有新人 fo 我舊推呀唔該）。
    
2.  有段時間我都試過瘋狂喺公海出 post 講返啲我想講嘅嘢，希望可以往好嘅方面影響到人，但講咗幾年覺得要講嘅一早講完，我覺得似集體打飛機多啲。九成人都係尋求認同多過尋求進步，寫得多呢啲 even 對我自己都唔係好事。
    

**你做緊 blockchain 嘢，實際上做緊咩？**

做 game，嚴格嚟講設計同埋營運，有時搭單做少少 community 同媽劇亭。我本行十幾年都係做 game，早幾年心淡已經考慮轉跑道，不過一開始搞自己生意就幾個浪冚埋嚟仆到直。馬死落地行嗰陣同而家公司傾傾吓覺得幾啱傾，而且見到 blockchain 將會做到啲我一直想見到嘅嘢，所以又碌返入嚟。so far 接近兩年符合我預期，大環境吹水 cap 水怪當然多，但唔係完全搵唔到 vision 相近嘅人。

**唔留喺港推，都可以喺香港啲 community 吹吓水……**

我唔想。

我知我唔係唯一一個專登講英文完全唔參加中文圈子事務嘅人（成日都話香港 blockchain 圈根本就 != 喺香港做緊 blockchain 嘢嘅人），甚至講緊唔係被逼講英文面對全世界嗰啲乜乜 VC 物物 founder，大把 artist 又好 dev 又好唔講你都唔知原來識講中文，呢種專登同中文圈劃清界線嘅人遠比你想像中多。就好似打機專登用男角唔表明自己係女仔嘅人其實多不勝數一樣，三個字：唔想煩。

中文圈有咩咁煩？投機、鬥威、攀關係。我唔係話外國無呀，問心而家 nobody 入嚟 blockchain 有幾多人真係 for the tech 唔係求財啫，但你俾少少心機就一定搵到個地方啲人係真心互相欣賞大家做咗出嚟嘅嘢，even 係嘩呢個 project 勁喎大家一齊搵快錢嘅 moment，都會去一齊分析項目背景同埋有咩蛛絲馬跡似唔似詐騙，而 且 唔 會 覺 得 權 威 大 晒。

我接觸嘅 99% 中文圈子不論粵港澳湛陸台星馬 blah blah blah 係點呢？啲人入一個新 project 嘅起手式係咁：搵中文 channel，入去認親伸手，永遠唔會出返嚟。

圍爐唔好咩？任何 community 本質都係一種圍爐唔係咩？問題係閂埋門唔出返嚟嗰種叫做燒炭，喺個郁得勁快嘅世界入面係致命嘅，加埋我以上講嘅投機鬥威攀關係三者都會令人更加 tunnel vision，唔只整死原本起個爐嘅人，生勾勾嘅入到嚟都俾你啲一氧化碳焗死埋。

我唔敢講呢種現象只係得中文圈有，日本韓國俄羅斯都有，但佢哋唔會完全唔走出去嘗試用英文同人溝通，喺無人做翻譯嗰陣亦唔會連自己撳個 google translate 都懶。以我所觀察到嘅中文圈係點呢？間唔中踩出去一兩句，但都係抱住一種「我哋」「佢哋」壁壘分明嘅動物園心態，到底當緊自己係籠入面嘅動物唔小心出咗嚟、定係遊客睇吓啲猩猩老虎大笨象就自己諗。見過啲中文圈極端例子，英文公告唔識睇就跳出嚟 d7 官方詐騙，人哋鬼佬答佢佢睇唔明就起晒槓屈埋啲鬼佬係官方打手。嗱我無開名話係邊度人呀自己估啦。

咁燒炭嘅結果係點呢？都唔講投機，就算呢度嘅人係咁純樸善良踏實都好，點解因為語言而圍爐，前提就係大家覺得用呢隻語言舒服過英文，而唔出去係因為真係舒服好很多嘛，咁咪永遠都有一個翻譯嘅過程，而又永遠係好舒服等翻譯嘅人佔多囉。Blockchain 世界嘅嘢好多消息係口耳 twitter 相傳唔會上新聞，即係當無翻譯嗰陣，你中文圈個世界就係靜止不動嘅，咁大家都食緊同一煲三手飯嘅情況下有啲乜嘢新嘢產生到呢？除非撞手神有啲文化差異得你中文圈先有嘅啫（通常係一秒諗到點花式割韮菜居多），但有幾多咁嘅 case？

咁對一個接收緊十倍外界資訊嘅人嚟講，咪就好似[柏拉圖個山窿](https://zh.wikipedia.org/wiki/%E5%9C%B0%E7%A9%B4%E5%AF%93%E8%A8%80)咁，你同啲望住個 2D projection 嘅穴居人講出面個世界原來係 3D 有景深嘅，啲穴居人一係就當你神咁拜，一係就當你黐線完全唔知你講乜囉。重要加埋鍾意認威嘅同崇拜權威嘅喺埋同一個地方，講多兩句都空氣突然安靜好似打破咗個權力平衡咁，咁點產生啲有營養嘅嘢啫。到真係一齊研究起上嚟，又返番去動物園心態，永遠係諗喺「人哋」舊嘢度可以令「我哋」有咩好處，永遠當自己係外星人嚟到地球順便抽晒啲石油返去做手信咁，炒賣、搭雞棚都已經算小兒科，其他唔講喇。

係呀，我唔係淨係話緊香港，而係我接觸到嘅中文圈子都係咁。你估我無試過埋台灣堆咩，除咗少咁啲鬥威鬥叻之外，投機同攀關係呢兩點根本一樣，同一批韮菜俾嗰幾把刀割完又割唔係無原因咖。嗰個「唔開名自己估嘅地方更加係 cls 到一個點，有無聽過 [AC 嘅 Rarity](https://github.com/andrecronje/rarity)？可以俾你整啲 on chain 嘅 DND 角色出嚟，每日可以跑 mission 又可以點技能整武器，啲角色同武器又可以同人 trade 咁？某地方有啲聰明科學家起咗七萬隻角色出嚟（自己諗吓七萬個 tx 一日要俾幾錢 gas，Fantom 都死），然後話 [AC 唔更新隻 game 呃佢錢正 PK 割韮菜](https://twitter.com/0xluden/status/1473861632660963339)……如果你係個正常人，點同呢班精叻科學家解釋 AC 做舊嘢出嚟 day one 就只係一個 demo，講緊 blockchain game 可以點做？就連個 frontend 都係 community 做出嚟，因為個 demo 真係只係得堆 code 嘅 smart contract？呢啲反白眼例子多不勝數，連我而家幫緊手個 DAO 都有啲類似情況，詳情唔講總之你明。

剩返 1% 嗰啲好 hardcore 嘅技術圈子就真係齋講技術，心態上同外國無分別，但我又嫌佢哋真係齋講技術，我又唔係 dev 出身就更加無乜 common ground。特別係我最關心嘅人文影響 even 對於 for the tech 嘅人嚟講好多都係關佢乜事，討論得多又會變成務虛。嘩嘩嘩好遙遠係咪？但你睇埋我最近篇文應該唔難估我係咩人啦。

我好似啱啱講完我做 game 咖可，又係圈子細細方丈大佬 everywhere，不了。其實呢個中文燒炭現象又點只 blockchain 呢，不過 blockchain 世界快到黐線，一慢咪好明顯囉。

**哦你即係話中文爐一定廢……**

點敢啫。如果個爐真係好開放好開放，大家都主動接觸大量外界資訊獨立分析唔會淨識問飛拜神抱佛腳唔爭住做大佬居高臨下而且樂意為個世界爐付出，件事應該會好健康咖。但問題係如果有個咁嘅爐，佢做乜一定要係中文啫。

**咁寫多啲中文囉好似而家咁？**

寫嘢若果唔係為咗自己過手癮，最終就係求記錄求傳播求影響求共鳴。中文圈咩質地就如上所述，一樣咁多時間我做乜唔直接面向世界？而我又有乜義務擺低我自己嘅 mission 照顧中文圈呢？

我認我時間少，我只能夠擺喺我認為最有可能最快開花結果嘅地方度。我以前諗過搞檔嘢專門 expose 啲騙案添，結果一試我就知無人感激你不特止（只會有人旨以你所謂 derug 等佢可以甩身），你最多只能將件事由負數拉返去零，不如做啲正數嘅嘢。You are early 嘅真正意義唔係你好 early 咁去上人哋架車，而係可以親手去塑造自己想要嘅未來，起碼我而家寫嘅嘢已經令我接觸到一兩個外國遊戲業界嘅真大佬，憎 blockchain 憎到死都專登 PM 同我講我係例外，我相信總會喺某時某刻改變到個世界。

再講，本來因為工作原因我寫嘅嘢都已經有啲位要就住就住，而偏偏中文/香港圈子越細越多花生又鍾意鬥威，講緊連我朋友企出嚟搞個 BB 班事後都俾人嫌三嫌四，我真係唔想一唔小心就得罪大佬阻人搵食手尾長，講多兩句又開始受人閒言閒語，因為我唔鍾意講投機又無十九幾隻馬騮喺手無咁鍾意曝光就代表我廢。

**錦鯉有咩高見？**

如果你好老實真係只係入嚟求財，圍爐未必會死。但如果你志願係做多啲其他嘢見識多啲，一定要盡快脫離啲三手飯拜神圍爐。無話唔圍得爐呀，但如果你好依賴嗰個爐獲得資訊……你明啦。 學英文，埋英文堆，習慣英文資訊源例如開過個 twitter 或者最少整個 list。你每日花喺無營養嘅圍爐多一分鐘，就少一分鐘去感受出面個世界，呢種惡性循環同現實無分別。學啲 19 職場雞湯話齋，每日進步 1% 一年就係 37 倍，喺幣圈呢個轉得咁快嘅地方，個分別可能唔係每日 1%，而係每個鐘 1%。

Chill 啲，你同啲鬼佬一啲分別都無，gm 咪 gm，做點頭朋友咪做點頭朋友，人哋閒話家常咪試吓搭嗲。你估全世界都英文好好咩，你睇唔出人哋英文廢係因為你英文廢，同樣道理其實好多人都睇唔出你廢，甚至連所謂 native 都會廢（我識個英國佬有某幾隻字成 Q 日串錯第樣……）或者口語化無咁講究，真係得某個地方啲本來就唔係 native 嘅人先會對其他人啲 accent grammar 咁多嘢講。

短炒易輸過長揸，炒即日鮮蝕心神，[DCA](https://zh.wikipedia.org/wiki/%E5%B9%B3%E5%9D%87%E6%88%90%E6%9C%AC%E6%B3%95) 儲錢然後做功課買二手藍籌會容易好多，起碼夜晚有覺好瞓。特別要提防搵你問飛同埋俾飛你嘅人，搵你問飛嘅人出事亦都會賴你（你當我哋成日講 #NFA #非投資建議 廢嘅咩），俾飛你嘅人就算係朋友無惡意，唔代表佢嘅分析一定好全面。何況投機嘅世界意外比你想像中多。

你絕對可以唔跟啲炒家一齊日日喺度好似 [moon moon](https://home.gamer.com.tw/creationDetail.php?sn=3132850) 咁嗌 to the moon，但總要搵個地方對你嚟講可以學到好多嘢。多嘅定義唔係你可以接收晒所有資訊，而係一定要超過呢個量，唔夠就再搵多啲。當你搵到嗰個地方，就諗吓點樣貢獻，通常係用你最擅長嘅技能。blockchain 世界最微妙嘅地方就係，越看似無乜用好少見嘅技能越建立到你自己定位。

我熟 NFT 多過幣，熟 sol 多過 eth，之後會寫篇專門講點樣入門搵 project 搵消息源同埋防中伏（唔包發達）嘅。英文呀唔使問。

**最後重有咩想講？** 有興趣可以 [subscribe 我 Substack](https://0xluden.substack.com) 同埋 [fo 我 twitter](https://twitter.com/0xluden)，得閒幫我 RT 吓就功德無量。我多數嘢真係唔會譯中文，我懶。唔係懶譯，係懶應酬。

同埋啲 19 giveaway 真係唔好 tag 9 me 啦乖，你真係要 join 嘅話地球上有好多死 account 可以 tag，最好開過個 twitter 嚟玩費事污染你自己條 feed。

Mirror 個排版真係好 19，打到呢度差啲忍唔住破戒爆晒啲粥粉麵飯出嚟。呢篇我 publish 完啲斷行同 bold 錯那晒翻手改咗兩次而且次次改都會爛第啲嘢，早知開多個 substack 又好 medium 又好無咁嬲。

---

*Originally published on [0xluden](https://paragraph.com/@luden/7WyeMt9QeUL48RCAQ67I)*